+0 به یه ن

چيلله گئجه سينده آغ ساققال لارين قدري

  يئنه چيلله گئجه سي گليب چاتدي و بير قديم دب اولاراق هامي قوهوم،طايفا آغ ساققال لارين ائوينه توپلانيب بو بايرامي عزيز توتوب بو گئجه نين دب لرين يئرينه يئتيريرلر.
چيلله گئجه نين فلسفه سي،باشلانيشي،گليشمه سي،...بو يازيدا وورغولانمياجاق اما يالنيز بير اونملي گلنه يه توخونا جاييق اودا عاييله لر ايچره بويوكلري ياد ائديب او شمعين دوره سينه پروانه لر تك ييغيشماقدير چيلله گئجه سينين هامي دبلري هله قيراقدا قالسين،تكجه بو قايداني نظرده توتساق چيلله بايرامينين اؤنميني ثبوت ائدر.
چوخ درين معنالي بو قايدالاردان دولايي چيلله بايرامي ايللر بويو طنطنه لي دوام ائدير.
بير طايفادا آغ ساققال لارين يئري و قدري بللي اولماسا او طايفا داغيلماغا محكوم دور. آغ ساققال لار سانكي بير تسبيح ايپي كيمي هامي دنه لري دوزه نه سالير.
آغ ساققالين آذربايجاندا يوكسك يئري و ده يري وار. عموميتده مقدس و تمييز بير اينساندي ،ياشي چوخ، تجروبه سي چوخ،دونيا گورموش و ديندار آدام دير.
آغ ساققال عاغلين زيروه سي دئمكدير،ياخشيني پيسدن سئچن گوزدير و بو مقامدا اؤز ائلينين،كندينين،محلله سينين يارديمجي سي اولور.بير اؤره كي يانان دده كيمي خالقا دوغرو  يولو گؤسترير،خير ايشلرده قاباغا دوشور.
آغ ساققالين آغيرليغي دانيشيقدا ،عملده،ادبده،اوتوروب دورماسيندا بللي ائدير.
لازيم دئييل آغ ساققالين چوخدا ساوادي اولسون اونلاريندا كي ساوادلاري يوخاريدي گره ك دانيشيقدا و داورانيشدا ساده اولسونلار.
آغ ساققال بير طايفادا و ائلده گئرچكدن بركتدي او قويماز عايله ايچره و عايله لر آراسيندا داوا دوشسون،داوالي اولانلاريدا باريشديرار.اونون سوزو حوكمدور، چوخ  واخت اونون سؤزو و حوكمو رسمي مقاملار و دئولت قانونلارينداندا كئچرلي دير.
اونون قاپيسي همه شه آچيقدير هامي دانيشماق و مشورت اؤچون اونا گئدرلر.اؤز ياشايشي چتين ليكده اولا بيلر آما خالق آرا چوخ  حؤرمتلي ديرلر. هميده چوخ مهربان و سئومه لي اينسانلارديلار.ائلين سؤز خزينه سي ديلر،قيشين سويوق و اوزون گئجه لرينده اولارين شيرين سؤز –صوحبتلري

    ائولره وائللره سيجاقليق باغيشلاير.