+0 به یه ن
فرداي ما-يكشنبه1دي ماه1392-شماره524

چيلله گئجه سينين سون ناغيلي

سولار پريسي

 

بير گون واريدي بير گون يوخويدو، تك تانريدان سورا هئچ كيم يوخويدو.

دريا آدلا اورمودا بير گلين واريدي چوخ دوزلو بير گلين ؛ گوزلري ماوي ، دامني آبي ، ساچلاري ساري ، سولار پريسي .

هر سحر تئزدن دالغالي ساري تئللريني اؤنونه توكوب داراردي ، گونش اونون اوزونه باخيب گولومسه يب چيخاردي، سونرا اورمويا آخاردي باغ-باغچايا  

 باخاردي ؛ دريا گؤزل گونلر ياشاردي ،قوجا- جاوان اوندا اوشاقليغين تاپاردي ، هر كيمسه ني سئويب آتيب-توتاردي ، آذربايجان ميللتينه بير مهربان آنايدي

سولار پريسي هردَن اورمو گؤلوندن چيخاردي ، دنيز قيراقلارين گَزردي ، لاله لره ال چكردي ، قوزولاري اؤپردي ، اوزوملردن يئيردي ، قوشلارا  دَن سپردي ، بولاغدان سو ايچردي ، او هاميني سئوردي هامي اونو سئوردي...

بير واخت گلدي سو يوللاري كسيلدي ، سولار پريسي سوسدو ،  دريا بئله سويوزدو! بولوتلاردان ايلديريملار شاخمادي ،سئللر سولار شاققيلدايب داشمادي ، قيزلار اونا صف باغلايب باخمادي ، گئتدي الدن شوكتيميز اي هوار ، باشين قوزا اي رحمتليك شهريار

 دريا قيزين دودوقلاري چاتلادي ، رنگي سولدو ساري ساچلار آغاردي ، ماوي گؤزلر آبي دونو آغاردي ، يئر گؤي هامي آغاردي ، اورمو خالقي آغلادي ، آذربايجان آغلادي ، اكينچي نين الي تيتردي ،شاعيرلرين سؤزي تيتردي ، آشيقلرين سسي تيتردي...

آما بئله اولماز ياني بئله قالماز ، حق بو دئييل ، هله ده گونش هر گون دوغودان چيخار ايلك اؤنجه درياني سالاملار سولار پريسيني تومارلار .

دريادان بير داملا قالسا بئله ،او پريدن بير تك نفس قالسا بئله ، اينان بونا ان اوزون گئجه ده ان قارانليق گئجه ده ان سويوق گئجه ده قارا بولوتلار چاخاجاق ، شيمشك ووراجاق ، دريا يئنيدن باش قوزوياجاق ، بير درين نفس آلاجاق ، گؤي گؤزلريني آچاجاق ،ياغيش ياغاجاق قار ياغاجاق ، سئللر داشاجاق ، سدلر سيناجاق، آيدينليق اولاجاق آيدينليق !

 او چاغ دريانين اوزي بير داها قيزاريب بوزارمياجاق ، سولار پريسينين بو حالينا گؤي گولومسه يب  باشيندان گؤي بويدا پاپاغيني چيلله گئجه پاي وئرَجك ، سحر تئزدن گونش يوخودان دورماق همي دريايا قيزيلدان دون وئرَجك ، پري دنيز كناري چايلار قيراغي يا مئشه لر ، چمنلر، باغلاردا گزَركن اياقلارينا چؤب-تيكان باتماسين دئيه يئرده اونا بير جوت ياشيل باشماق وئرجك . 

گؤيدن اوچ آلما دوشدو بيري منيم بيري سنين بيريده سولار پريسينين .