+0 به یه ن

ايندي كي مامايي لرين و مادر بزرگ لارين آجيخلاري گلسه ده-گلمه سه ده،دئيرم:ائله ننه،خان ننه ده دئينده قديمكيلر!
قديم ننه لرين اؤزلليكله آغ بيرچك خان ننه لرين اؤزلرينه گؤره بير قداستلري و حورمتلري واريدي.
گؤرموشدوك بعضي مامان لارين اوشاقلاري فارسي دانيشسالاردا،بويوك ننه و بابالارا گلديكده،سانكي موقدس اصالت لرينه يئتيريب آنا ديل كي نه دئييم،خان ننه ديلينه باش اييب گؤزل توركجه دانيشارديلار آما ايندي گؤروروك او تيپده جوجوخلارين قارشيسيندا خان ننه لر باش اييب زيققانا-زيققانا دئيير:بگو ببينم چقدر مادر بزرگ را دوست داري!
حله لاب زيل توركجه دانيشاندادا بو مادر بزرگ كلمه سي بيرجه آغزيندان دوشمور بو نئچه ايلين عرضينده بو مادر بزرگ كلمه سي ائله موسري درد اولوب كي خود منيم اوشاقلاريمادا سرايت ائديب! دوزدو من اوشاقلاريما واختيندا واكسن   وورموشام آما او گون مادر بزرگ ويروسوندان بير نمونه سين اوغلومدا گؤردوم.بيلميرم مدرسه ده صينف داشلاريندان توتوب يا تيلويزيوندان. آما سؤز گليشي او گون ايلك دفه اولاراق  آغزينا گتيردي سانكي منيم رحمتلي ننمه،خان ننمه  تمام آذربايجان آنالارينا اهانت ائله دي. بيله سينه بير لحظه ائله حيرصله چپ باخديم،حيوان اوشاق اؤزون ايتيردي  دئديي سؤزه فيكيرلشك همن منظورومو آنلاييب بير گولومسه دي دئدي:ياني دئييرم خان ننه!
منده بو يانيلماغين اول- آخير اولماغين بيله سينه خاطيرلاتديم.
ياديما گلير بيز اوشاق كن تزه-تزه ماما دئمك مد اولوردو اما بيزلر ننه دئمه يه  چوخ گوونيب فخر ائدرديك  هر كسده ماما دئسه يدي مسخره ائدرديك اودا اوتانجاقدان او سؤزي دئمزدي آما بيزدن سوراكي اوشاقلارين آغزيندا ياواش -ياواش ماما دئمك دب اولدو اينديسه مادر بزگ ويروسودا ايستير خان ننه ميزي اؤلدوره .آما سيزي  آناييزين حؤرمتينه آند وئريرم باري قويمايين خان ننه نين قالاسي يئخيلسين .
خان ننه دئيه نده ائليميزين ننه سيدي اونون حؤرمتي چوخ چوخ يوكسكدي،اوشاقلارا اونون حؤرمتيني خاطيرلادين.
اونون قورو دانيشيغي،شيرين ديلي،ناغيللاري،شعرلري،باياتيلاري،تاپماجالاري...ائليميزين زنگين خزينه سي دير.اونو اؤزلليكله قورويون و اوشاقلارا دَيَريني آنلادين.ائوده، فاميلده،ائلده خان ننه اصلدي،ميزاندي،قانوندي.
سي ايله چوخ زورلا فارسي  دانيشان خان ننه ني گؤرندن بري باشيمدان آغري قالخيب؛ ايچيمدن يانيرام.خان ننه او قدرده اسكيلمه مه ليدي يالنيز بير آغ بيرچك قادين يوخ  من آنا ديليميزي ،ائليميزي،فولكولوروموزو او بيج جوجوغون  قارشيسيندا اييلمه غين،آلچالماسين،ييخيلماسين،سينماسين گؤردوم اودور كي يانيرام ياخيليرام.
ساباح آنا گونو باخساز هر يئرده آنالاري تعريف ائده جكلر اما من عوذور ايستيرم دردلريم دئشيليبده بعضي آنالاري تنقيد ائده جم .
تورك اوشاقلارين فارسي دانيشديرماق قونوسوندا بعضي آنالارين هاميدان چوخ سوچو وار.
آنا ديليني اوجوز ساتان آروادلارا يوخ،آنا ديليني  اؤز آنالاري،ننه لري و خان ننه لري كيمي اؤركدن سئون قادينلارا بو گون موبارك!